KUCHING – Sarawak keran nentuka nembiak nengeri tu diberi akses latih bepelasarka teknologi, ku Menteri Pelajar, Inovasyen enggau Pemansang Penau Sarawak, Datuk Seri Roland Sagah Wee Inn.
Ku iya, Pelajar Latih Teknikal enggau Vokasional (TVET) nyadi pugu ngemansang modal mensia bepengelandik tinggi tu.
“Latih bepelasarka teknologi ti meseti dikemerat ngagai nembiak baka Pemintar Digaga (AI), Data Besai, automasyen industri enggau teknologi gadung.
“Nya kebuah Politeknik enggau Kolej Komuniti (POLYCC) tu entara institusyen beguna ti ulih nempa pengereja pengawa ti relevan, ulih neleba kediri enggau inovatif dudi hari,” ko iya.
Sagah nibar jaku nya ba Pengerami Konvokesyen Politeknik enggau Kolej Komuniti Zon Sarawak 2025, di Dewan Jubli Politeknik, ditu kemari.
Sagah madah, Polisi TVET Menua 2030 enggau Strategi Pemansang Pengudah COVID-19 (PCDS) 2030 bela beguna ngangkat Sarawak nyadi hab pemansang penau enggau inovasyen serantau.
Nengah Opis Pelajar, Inovasyen enggau Pemansang Penau Sarawak (MEITD), iya madah ke Perintah Sarawak keran ngemujur pemansang modal mensia lalu meri perati ngagai Program TVET ti fleksibel, responsif enggau inklusif nipak peminta industri enggau landskap gawa dudi hari.
“Nya kebuah, beguna endar kitai terus negap kerejasama entara POLYCC, industri enggau Perintah Sarawak nentuka pemujur enggau pemeruan ekosistem TVET.
“Aku pechaya, kitai ulih negap TVET nyadi penyungkak besai pemansang nengeri enggau menua nuju ekonomi bemalinka penemu enggau inovasyen nengah sukung MEITD enggau ejensi bekaul,” ku iya.
Nambah ke nya, Sagah meri terima kasih ngagai semua raban POLYCC ti udah mujur nempa graduet bepenemu enggau bisi pengelandik tinggi.
“Pemujur tu asil kerejasama pintar entara akademia enggau industri. “Graduet POLYCC nyata sedia napi pemar dunya industri sereta nyungkak pemansang ekonomi enggau pemansang nengeri sereta menua.
“POLYCC nambah 40 peratus ari pengereja pengawa teknikal menua. “Pemujur tu nyeremin pengeransing bala pengelicha sereta kerjasama rat entara institusyen, industri enggau perintah nentuka pelajar vokasional enggau teknikal mengkang relevan enggau besemekih,” ku iya nyemetak.
(Kredit kepada wartawan Siti Nurain Ratani dari akhbar segmen RUAI Suara Sarawak : keratan akhbar muka surat 1 bertarikh 11 Ogos 2025)
