![](https://news.mypolycc.edu.my/wp-content/uploads/2024/08/pahang-media-moh.jpeg)
TV Sarawak, 16 Oktober 2023
BETONG, 16 Okt: Kaban Parlimen Betong Dr Richard Rapu terus meransang rebak baru di menua tu anang takut belajarka bidang Pelajar Teknikal enggau Latih Vokasional (TVET).
Ku iya, raban nembiak patut beratka bidang TVET laban nyerumba pemansang ekonomi baru chukup mayuh begunaka orang ti tebangkar dalam bidang nya.
“Aku ngarapka ari penyampau agih belanja ke baru dibantai, kita (raban nembiak) bela ngerebut peluang nya.
“Pesan aku nuju bala kitai ke agi belajar anang takut ke bidang TVET laban lebuh ninga bidang Teknikal, Vokasional, Injiniring enggau Matematik tu tadi mayuh orang takut.
“Bidang tu enda tau enda dipelajar laban dudi hari ila mayuh peminta nyerumba pemansang ekonomi baru,” ku iya.
Iya madah munyi nya lebuh dipinta meri timbal bekaul enggau Bajet 2024 ti ngaul bidang TVET dibantaika Menteri Besai Datuk Seri Anwar Ibrahim ba Parlimen sebedau tu sepengudah Nutup Program Pembelajaran Sepanjang Hayat (PSH) diatur Kolej Komuniti Betong kena Hari Enam.
Ungkup penemu, bekau ari pemesai guna tebangkar dalam bidang TVET dia Perintah Penyerakup udah ngemendarka agih belanja besai sepenyampau RM6.8 bilion ba Bajet 2024 dikena ngemansangka agi bidang pelajar nya.-TVS